Акафист священномученику архидиакону Никифору (Кантакузину)

Кондак 1 

Избранный Богом защитниче веры православныя, благочестиваго Собора Берестейскаго первоседальниче, нечестивых отступников от Святыя Церкве обличителю, похвальная пения приносим ти, священномучениче Никифоре, ты же, яко имеяй дерзновение ко Господу, молитвами твоими укрепи ны в вере и благочестии, да зовем ти:
Радуйся, священномучениче отче наш Никифоре, православныя веры поборниче.

Икос 1 

Ангелов чини удивишася дивному о тебе смотрению Божию, яко от юности избра тя Господь в служение великое, да вси людие, видяще крепость веры твоея и чистоту душевную, восхвалят тя сице:
Радуйся, страны Греческия дивное прозябение;
Радуйся, пределов Русских богодарованное посещение.
Радуйся, от юности Господа возлюбивый;
Радуйся, плотская мудрования Дух покоривый.
Радуйся, от душепагубных путей устранивыйся;
Радуйся, путем спасения шествовати устремивыйся.
Радуйся, суеты мира сего обличителю;
Радуйся богоугоднаго жития устроителю.
Радуйся, священномучениче отче наш Никифоре, православныя веры поборниче!

Кондак 2 

Видяще ближнии твои от младенства в богомудрии и любомудрии преуспеяние, вдаша тя к научению книжному, да, припав ко источником словес Божественных, во умилении воспоеши Богови: Аллилуиа.

Икос 2

Разум твой напитал еси во странах Италийских, идеже мнозии сограждане твои в научении быша, и по некоем времени избраша тя во ректора училища еллинскаго. Ты же не о чести и славе прилежал еси, но об устроении добродетельном души своея и порученных ти. Темже вси восхвалиша тя:
Радуйся, нечестивых соборищ и богомерзких обычаев уклонивыйся;
Радуйся, к человекобожию италийскому своим сердцем не прилепивыйся.
Радуйся, сокровищ Божественных во уме и сердце стяжателю;
Радуйся, святителем Василию и Григорию во учении подражателю.
Радуйся, богомудрием своим православных возвеселивый;
Радуйся, иноверных риторов зело удививый.
Радуйся, яко тебе ради Православие вознесеся;
Радуйся, яко тобою всякое самомнение постыдеся.
Радуйся, священномучениче отче наш Никифоре, православныя веры поборниче.

Кондак 3

Силу словес твоих, яко делы благими подтверждена есть, уразумевши святейшая Патриархия Цареградская, призва тя к служению в Церкви Велицей, от неверных порабощенней, да тебе ради прославится имя Господне хвалебною песнию: Аллилуиа.

Икос 3 

Имущи таковаго светильника, возрадовася Церковь Греческая, леты многия в гонениях и утеснениях от зловредных агарян пребывавшая. Ты же, отче Никифоре, не токмо саном священным почтенный, но и происхождением от царскаго рода Кантакузенов возвеличенный, всею душею об устроении церковнем прилежал еси. Сего ради многажды слышал еси:
Радуйся, Триипостаснаго Бога верный служителю;
Радуйся, апостолом и святителем соревнителю.
Радуйся, Патриарху Цареградскому Иеремии неленостный помощниче;
Радуйся, пред магометаны ежедневный веры Христовой исповедниче.
Радуйся, многия напасти и поругания претерпевый;
Радуйся, к делу Божию николиже сердцем охладевый.
Радуйся, прещения мучительскаго не устрашивыйся;
Радуйся, твердый защитник Святыя Церкве явивыйся.
Радуйся, священномучениче отче наш Никифоре, православныя веры поборниче!

Кондак 4 

Бурю внутрь имуще помышлений сумнительных людие православнии во стране Польско-Литовстей, егда уведаша о замыслех нечестивых извести Святое Православие и насадити латинство, обаче, силою Божиею укрепляеми, воодущевишася противу кознем их, вопиюще Всесильному Богу: Алиллуйа.

Икос 4 

Слышаще о добродетельном житии и мудрости многой архидиакона Никифора, известиша братство Львовское и благоверный князь Острожский Церковь Цареградскую о грядущем бедствии на Православие и просиша прислати в помощь сего богоноснаго мужа, глаголюще:
Радуйся, священнейший отче, и прииди к нам вскоре;
Радуйся, помощниче наш в постигшем ны горе.
Радуйся, светильниче богопросвщенный;
Радуйся, саном Патриаршаго Экзарха почтенный.
Радуйся, Соборныя Апостольския Церкве труба многогласная;
Радуйся, лжепастырей и волков гроза ужасная.
Радуйся, яко тобою Православие возвышается;
Радуйся, яко тобою всякая схизма посрамляется.
Радуйся, священномучениче отче наш Никифоре, православныя веры поборниче!

Кондак 5 

Боготечней звезде уподобляяся, от Востока в страны Полунощныя востекл еси, отче, да со всеми верными разгониши мрак греховный и да ничтоже возмогут служителие тьмы противу сынов света, поющих выну: Аллилуиа.

Икос 5 

Видев стенания и слезы православных людей земли Валашския, по смерти воеводы Петра в междоусобие вверженыя и насилие от султана турскаго и гетмана польскаго терпящия, пришел еси к ним на помощь, отче Никифоре, и Божиим содействием умирися страна та, и вси восхвалиша тя, ликующе:
Радуйся, треволнений предстательством своим умирителю;
Радуйся, нечестивых и гнусных замыслов разрушителю.
Радуйся, по слову Божию всем благотворивый;
Радуйся, и гетмана польскаго от плена свободивый.
Радуйся, незлобием своим пашу турецкаго уротивый;
Радуйся, свирепство его на милость пременивый.
Радуйся, православныя земли Валашския похваление;
Радуйся, на всяком месте призывающим тя заступление.
Радуйся, священномучениче отче наш Никифоре, православныя веры поборниче!

Кондак 6. 

Проповедует Церковь Русская сугубыя подвиги и труды твоя, отче священнейший, за Святое Православие зде подъятыя, и вопиет непрестанно во умилении Господеви: Аллилуиа.

Икос 6. 

Возсиял еси воистину яко звезда путеводная собору благочестивому, во граде Берестейстем собранному противу разбойническаго соборища лжепастырей, и явился еси твердый Православия защитник, всем указуя путь ко спасению. Сего ради приими от нас похвалы сия:
Радуйся, догматов веры и преданий святоотеческих ревнителю;
Радуйся, канонов и  правил Святыя Церкве блюстителю.
Радуйся, о вразумлении отступников зело ревновавый;
Радуйся, трикраты на собор их призывавый.
Радуйся, злокозненных учеников Иудиных безстрашно обличивый;
Радуйся, данною ти властию от Церкве их отлучивый.
Радуйся, Эфесскому святителю Марку подражателю;
Радуйся, единаго, еже есть на потребу, стяжателю.
Радуйся, священномучениче отче наш Никифоре, православныя веры поборниче!

Кондак 7

Хотя беззаконных злодейство явити, да не обольстят верных отступством своим, слезно молился еси, отче Никифоре, о знамении свыше для укрепления малодушных и посрамленных еретиков, и, получив просимое вскоре, взывал еси с радостию: Аллилуиа.

Икос 7

Дивное знамение яви Господь по молитвам святаго Никифора на посрамление еретиков, егда в соборней церкви святителя Николая отступницы дерзнуша совершати Божественную Литургию со еретики, вино в Чаше претворися в зловонную воду во обличение и наказание их. Людие же, узревше сие Божие предостережение, отвергшеся унии, возопиша:
Радуйся, богомудрый Никифоре, нечестивых посрамителю;
Радуйся, и буди нам ко спасению учителю.
Радуйся, святителю Николаю нравом подражавый;
Радуйся, силу благодатную от Господа стяжавый.
Радуйся, яко тобою неправда обличися;
Радуйся, яко тебе ради суд и истина явися.
Радуйся, злочестивыя службы отрешителю;
Радуйся, Божественныя Евхаристии сослужителю.
Радуйся, священномучениче отче наш Никифоре, православныя веры поборниче!

Кондак 8. 

Странно и ужасно бе слышати лжепастырем, яко Экзарх Никифор не убояся грознаго повеления краля-мучителя и не бежа от пределов страны Польско-Литовския, но с благоговением выну вопиет ангельскую песнь: Аллилуиа.

Икос 8. 

Весь явился еси воистину всем помощник, блаженнейший отче, егда по разсеянии верных не поколебался еси, но со дерзновением и властию устремился еси на защиту Церкве Православныя, устрояя братства, обители и приходы в пределех, униатами порабощенных. Таковыя ради ревности приими от нас похвалы сия:
Радуйся, словом и писанием верных укреплявый;
Радуйся, от униатския клятвы люди свобождавый.
Радуйся, вдовствующую Митрополию сохранивый;
Радуйся, ея устроение Господеви вручивый.
Радуйся, обителей благочестивых покровителю;
Радуйся, приходов православных устроителю.
Радуйся, церковным братствам многажды помогавый;
Радуйся, на подвиг исповедничества всех призывавый.
Радуйся, священномучениче отче наш Никифоре, православныя веры поборниче!

Кондак 9

Всякия клеветы и злоречия наполнишася уста еретическая, желающе погубити тя, отче Никифоре, ты же с радостию потекл еси на предлежащий подвиг, поюще: Аллилуиа.

Икос 9

Витии многовещанныя собрашася на судилище беззаконное, хотяще осудити тя на смерть яко преступника и предателя, обаче соборище их, суеты и лжесвидетельства исполненное, никакоже возможе ни в чем обличити тя. Верныя же, слышаще о сем, восхвалиша тя сице:
Радуйся, во всем Пастыреначальнику Христу уподобивыйся;
Радуйся, неправеднаго судилища не убоявыйся.
Радуйся, от слуг Иудиных пощады не желавший;
Радуйся, синедрион беззаконный их обличивший.
Радуйся, отвергший измышления новаго Пилата;
Радуйся, яко от твоих словес обезумела его палата.
Радуйся, от латинскаго фарисейства претерпевый;
Радуйся, за Истину живота своего не пожалевый.
Радуйся, священномучениче отче наш Никифоре, православныя веры поборниче!

Кондак 10. 

Спасти хотяще Экзарха Никифора от судища неправеднаго, послы православныя и вельможи русския на сейме Варшавском просиша представити дело его, да возможно будет приняти решение законное. Обаче латинники воспротивишася сему, желающе не правды, а смерти праведнику. Он же, о сем добре ведая, в спокойствии духа глаголаше: Аллилуиа.

Икос 10

Стена и оплот явися ти, отче Никифоре, вера православная, о нюже сокрушися гордыня и злоба диавольская, и ни в чемже возмогоша неправеднии укорити тя. Обаче не отпустиша, но в темницу всадиша тайно, дондеже новая обвинения умыслят. Таковое терпение твое похваляюще, восклицаем:
Радуйся, на камени веры житие свое устроявый;
Радуйся, сего ради во искушениих устоявый.
Радуйся, темничное заключение кротко претерпевый;
Радуйся, во хладной крепости пламенем веры горевый.
Радуйся, непрестанно восхвалявший Господа в нощных бдениих;
Радуйся, грозный обличителю неправедных судей в сонных видениих.
Радуйся, яко имени твоего униаты трепетаху;
Радуйся, убити тя неправедно замышляху.
Радуйся, священномучение отче наш Никифоре, православныя веры поборниче!

Кондак 11. 

Пение всеумиленное приносил еси Богови в крепости Мариенбургстей, идеже умыслиша уморити тя, отче Никифоре, мучители неправедныя, ты же неотступно взывал еси Единице Триипостасней: Аллилуиа.

Икос 11. 

Светозарный светильник явился еси, богопросвещенне, Церкве Вселенския, егоже ни мрак темничный, ни клевета вражеская, ни время погасити возмогоша. Всуе радовашася безстыдныя и беззаконныя смерти твоей от глада и поруганию имени твоего, ибо Господь прослави тя и дело святое, а их злоумышления и имена погибоша с шумом. Мы же, вернии, тако речем ти:
Радуйся, гетмана короннаго от смерти избавивый;
Радуйся, от него же на смерть предание приявый.
Радуйся, посрамляющий неправду и козни униатов;
Радуйся, укоризно малодушию и буйству Мелетиев и Иоасафатов.
Радуйся, мечем слова Божия нечестивых посекаяй;
Радуйся, злоречивыя уста их доныне заграждаяй.
Радуйся, расторгающий козни их яко паучину;
Радуйся, ратоборче безбоязненный за истину.
Радуйся, священномучениче отче наш Никифоре, православныя веры поборниче! 

Кондак 12. 

Благодать данную ти от Бога добре ведуще, отче Никифоре, к заступлению твоему прибегаем, да укрепимся во Святом Православии, единым сердцем и едиными усты восклицающе песнь: Аллилуиа.

Икос 12. 

Поюще твое прославление, восхваляем Господа, явившаго тя Церкви Своей новаго заступника и молитвенника, во дни сия дарованнаго. Приими от нас сие малое, обаче благодарное пение:
Радуйся, Церкве Киевския и Галицкия украшение;
Радуйся, Православия во граде Львове укрепление.
Радуйся, Митрополий Белорусския и Польския новый предстателю;
Радуйся, благодеющий силою Божией всякому твоему почитателю.
Радуйся, землю Берестейскую и Волынскую молитвенным защищением покрывающий;
Радуйся, со преподобномучеником Афанасием Пречистую Богородицу за ны умоляющий.
Радуйся, яко сонм исповедников и мучеников тобою похваляется;
Радуйся, яко тобою Православие в земли нашей утвержадется.
Радуйся, священномучениче отче наш Никифоре, православныя веры поборниче!

Кондак 13. 

О всехвальный угодниче Божий, Патриарший Экзарше, священномучениче архидиаконе Никифоре! Донеси молитвы сия наша ко престолу Господа Вседержителя, да в ковчезе спасительном Церкви Христовой сподобимся безмятежно преплыти житейское море и улучити вечное спасение и вместе с тобою воспети: Аллилуиа.

(Этот кондак читается трижды, затем икос 1 и кондак 1)

МОЛИТВА

Отче Никифоре, всегдашний за нас пред Богом ходатаю и ныне Церковию всему миру явленный! Житием своим ты показал еси любовь Христову до смерти за други своя и стояние за Истину даже до крове. Вемы, яко твоим предстательством Православная Митрополия Киево-Литовская сохранися и торжество ея на соборе Полотстем явися. Обаче грех ради наших братия наша земли Галицкия ослеплению ныне предашася и от Церкви уклонишася, и во иных местех злокозненная поползновения открышася. Ведуще, яко в сию годину промыслительно яви тя Господь новаго молитвенника и предстателя за Святое Православие, взываем ти: умоли Вседержителя Бога соблюсти и сохранити Апостольскую Соборную Церковь невредиму от всяких ересей, нестроений и расколов, наипаче же от ветром колеблемых пастырей и человекоугодников. Укрепи в нас ревность о славе Божией, да всяк во своем звании и чине словесы и делы богоугодными явится истинный последователь Христа Спасителя, и да прославится о сем Всесвятейшее Имя Отца и Сына и Святаго Духа, во веки веков. Аминь.

Протоиерей Георгий Соколов, 
Минская духовная академия и семинария
при Свято-Успенской Жировичской обители,
22 февраля/7 марта 2002 года.


Тропарь
глас 5 

Земли Греческия отрасль преславная священномучениче архидиаконе Никифоре, латинских лукавствий обличителю, веры православныя утверждение, за Христа быв гладом уморен, на небеси песнь Ему поеши дивную; о нас моли спастися душам нашим. 

Кондак
глас 3 

На соборе Берестейстем, Никифоре премудрый Экзарх, отступивших от веры Православныя посрамил еси, ныне же во граде небеснем у Христа Царя со ангелы ликуеши. 

Величание

Величаем тя, страстотерпче святый, священномучениче архидиаконе Никифоре, и чтим честная страдания твоя, яже за Христа претерпел еси.

Кнопка «Наверх»
Закрыть